BAGUIO CITY – Linawlawagan ti dadaulo ti Baguio City Police Office (BCPO) – Traffic Enforcement Unit ti panakaikarga dagiti plastic barriers ken tali kadagiti kalkalsada ditoy siudad ti Baguio.
Iti interview ti Bombo Radyo Baguio kenni PLt.Col. Oliver Panabang, panggep ti addang a maprebentaran dagiti killaat a panagrikos dagiti motorista kadagiti kalsada ken tapnu surutenda ti designated U-turn areas.
Sigun kenkuana, naobserbaranda ti saan a panagsurot dagiti dadduma a motorista iti umno a disso para iti U-turn a mangituntunda iti nabuntog a garaw ti trapiko.
Iyap-apelana pay kadagiti motorista ti saanda a panagdungpar kadagiti imunmuntarda a center barriers kadagiti kalkalsada.
Dinakamatna a madaddadael ken maab-abotan dagiti center barriers nga imunmuntarda gapu iti panakadungpar dagitoy.
