BAGUIO CITY – Insayangkat ti Police Regional Office Cordillera (PROCOR) ti PNP Modified Handgun Marksmanship Competition sadiay Camp Major Bado Dangwa, La Trinidad, Benguet.
Paset daytoy ti pagkasapulan iti agtultuloy a panakapapintas ti abilidad ken kinalaing wenno kabalinan dagiti pulis iti rehion Cordillera, nangruna iti panagamat ti armas.
Dumanon met iti 55 a pulis a manipud iti nagduduma nga yunit ti pulisya iti rehion ti nakipaset iti kompetisyon, no sadino, dagitoy ti maibilbilang a ‘best shooters’ ti nagtaudanda nga yunit.
Kalpasan ti kompetisyon ket nagkampeon ti Benguet Provincial Police Office Team 1 bayat a first runner-up ti Baguio City Police Office Team 1; second runner-up ti Ifugao Provincial Police Office ken third runner-up ti Benguet Provincial Police Office Team 2.
Malaksid iti daytoy, 10 kadagiti partisipantes a pulis ti naklasipikar kas Marksman bayat a 43 ti Sharpshooter ken 2 ti Expert.
Inyunay-unay met ni PROCOR Deputy Regional Director for Operations PCol. John Chua ti panagbalin a responsable ken nalaing nga ag-iggem iti armas dagiti amin a pulis tapnu agbalin nga epektibo ti panangaramidda iti mandatoda.
