BAGUIO CITY – Manamnama a ngumato ti bilang dagiti turista a sumarungkar ditoy siudad ti Baguio iti umadani a holiday season.
Sigun kenni Mayor Benjamin Magalong, dumandanon iti 300 ti innaldaw a bilang dagiti turista a sumarsarungkar ditoy siudad ngem inaklonna nga adayo ti nasao a bilang no idilig iti puntiryada a 500 a turista iti innaldaw.
Namnamaenda met nga umado pay dagiti agdama a turista ditoy siudad gapu iti panangnagto ti bilang dagiti nagpareserba a turista kadagiti nagduduma a hotel ditoy Baguio.
Innayonna a daytoy ti mangipasimudaag iti nagtalinaed a panagtalek dagiti bisita iti agtultuloy nga aksion ti lokal a gobyerno tapnu mapaksiat ti COVID-19.
Inyunay-unay ni Mayor Magalong a saan a lapped ti COVID-19 iti panaglukat ti turismo ti Baguio ken kasapulan ti panaglukat ti turismo tapnu mabiag manen ti ekonomiya ken agsubli ti panggedan dagiti stakeholders ti industriya.
Impanamnamana pay ti agtultuloy a panakaipatungpal dagiti health protocols ken dagiti entry and exit protocols para kadagiti turista a sumang-at ditoy siudad.
