Panakaipasdek ti kanayonan nga evacuation centers iti Cordillera, naipanamnama

BAGUIO CITY – Naipanamnama ti panakaipasdek ti kanayonan nga evacuation centers iti nagduduma a paset ti Cordillera Region.

Sigun kenni Department of Public Works and Highways (DPWH) Cordillera regional director Khadaffy Tanggol, adda ti siam nga evacuation centers a manarimaan a maipaspasdek iti rehion.

Kinunana a mainayon daytoy iti agdama a siam nga evacuation centers iti nagduduma a paset ti rehion.

Innayonna a maur-uray ti instruksion ti DPWH central office no mabaliwan ti disenyo dagiti evacuation centers ken pasilidad iti rehion.

Immunan nga inwaragawag ni DPWH Secretary Mark Villar a puntiria ti ahensia ti mangipasdek iti 200 nga evacuation centers iti nagduduma a paset ti pagilian.