BAGUIO CITY – Dumanon iti P17.46-B ti singasing a pondo para iti nagduduma a proyekto a pang-imprastraktura dagiti nagduduma a probinsiya iti rehiyon Cordillera iti sumaruno a tawen.
Maibasar iti datus ti Department of Public Work and Highways (DPWH-CAR), nailatang ti kadakkelan a paset ti pondo para iti probinsia ti Benguet, sarsarunuen ti probinsia ti Kalinga, Abra, Apayao, Mountain Province, Ifugao ken Baguio City.
Nasurok a P3.4-B ti para iti asset preservation program, pakairamanan ti rehabilitation, upgrading ken maintenance.
Nasurok met iti P2.6-B ti para iti network development program kas iti road widening bayat a nasurok P362-M ti nailatang para iti konstruksion dagiti rangtay ditoy rehiyon.
Nasurok pay iti P2.24-B ti para iti flood management program, P3.13-B iti convergence and support program ken P5.6-B iti local programs pakairamanan ti national building program ken local infrastructure program.
Impanamnama met DPWH-Cordillera Regional Director Khadaffy Tanggol nga agtultuloy latta ti panangipatungpalda kadagiti nagduduma a proyekto ti ahensya para iti panakapapintas dagiti imprastraktura iti rehiyon.
