BAGUIO CITY – Nangrugin idi kalman ti experimental traffic scheme ti truck ban ditoy Baguio City.
Kasaruno daytoy ti panangaprobar ni Mayor Benjamin Magalong iti kiddaw ti maysa a grupo dagiti inter-island vegetable truckers ti Benguet a panakapa-ababa ti 4PM-9PM a truck ban ti Baguio para ita a holiday season.
Sigun kenni Department of Agriculture- Cordillera regional director Cameron Odsey, manipud iti 4PM-9PM ket nagbalin a tallo nga oras ti truck ban para iti malem wenno iti 4PM-7PM.
Inlawlawagna a kasapulan a nasapa nga agrubuat manipud iti Benguet wenno Baguio dagiti truckers a naglaon kadagiti nateng tapnu masangbot dagitoy dagiti barko kadagiti sangladan.
Innayonna a no saan a makamakam dagiti truckers dagiti barko a pakaiyakaran dagiti nateng ket dakkel ti posibilidad a masayang ken madadael dagiti nasao a produkto.
Maipalagip a tunggal holiday season ket makidkiddaw ti panakailaksid iti truck ban ti Baguio dagiti trak a naglaon kadagiti natnateng a maisalog manipud iti Benguet gapu iti panagngato ti pagkasapulan iti highland vegetables.
