BAGUIO CITY – Kinedngan ti Supreme Court First Division a guilty ni Cabanatuan City Municipal Trial Court in Cities (MTCC) Branch 3 Judge Nelson Largo iti simple misconduct ken minultada daytoy iti P11,000 kasaruno ti nagbalin a kontrobersiya iti iligal a panagparadana ditoy siudad ti Baguio idi Oktobre ti napalabas a tawen.
Nailanad daytoy iti kopya ti desisyon ti korte a naawat ti Office of the City Mayor kas sungbat iti surat ni Mayor Benjamin Magalong mainaig iti pakaseknan dagiti traffic law enforcers ti siudad a nakasuan iti indirect contempt babaen iti nasao nga ukom kalpasan a naipaayan daytoy ti traffic citation ticket gapu iti iligal a panagparadana iti markado publiko ti Baguio idi October 25, 2019.
Maipalagip a gapu iti insidente ket impasa ti lokal a konseho ti siudad ti resolusyon a nangideklara kenni Largo a persona non grata ditoy Baguio City.
Impetteng ti konseho a ti panakatiket ni Largo gapu iti iligal a panagparada iti merkado publiko ket maitunos iti Ordinance No. 01, series of 2003 wenno ti Baguio City Number Coding Scheme.
