BAGUIO CITY – Mamati ni sigud nga Ifugao Representative Teddy Baguilat Jr. a paset ti diversionary tactics ti Duterte Administration ti panakairaman ti naganna iti maatap a korapsion iti DPWH.
Iti interview ti Bombo Radyo Baguio, kinuna ni Baguilat a mamati daytoy a ti panag-post-na iti social media seknan iti isyu ti Sinopharm ti rason iti panakairamanna iti maatap a korapsion iti DPWH.
Kinunana a nabiag manen ti isyu iti korapsion tapnu sadiay a maipamaysa ti imatang ti publiko ken saan a madlaw wenno mababalaw ti kinakurang ti gobyerno iti panagresponde daytoy iti COVID-19 pandemic.
Nupay kasta, impasigurado ti sigud a kongresista a nakasagana daytoy iti aniaman nga imbestigasyon iti nasao nga alegasyon kagiddan ti panangipettengna a kas iti kinuna ni Pres. Duterte ket awan ti natibker nga ebidensia a mangimameg kadakuada iti pammabasol.
