--Ads--
BAGUIO CITY-- Ngimmato ti kaso ti online scam ditoy rehiyon Cordillera manipud idi napalabas a tawen wenno kabayatan ti COVID-19 pandemic.

Iti interview ti Bombo Radyo Baguio kenni Police Regianal Office Cordillera Anti-Cybercrime Unit Deputy Chief PLt.Col Divina Mencio, kinunana a nagdoble ti bilang dagiti biktima iti naduma-duma a modus iti online scam.

Sigun kenkuana, karaman kadagiti modus nga agraraira ita iti online ket ti panaglako ti bogus wenno peke a produkto, panagdawat ti donasion a kwarta ken investment scam.

Inaramidna kas basaran ti panaglako iti face mask ken face shield nangruna ita a pandemya, nu sadinno, adda dagiti nakaawat ti peke a produkto wenno saan ket awan ti simmangpet iti order dagitoy.     

Gapu iti dayta, kiniddawna ti panagridam ti publiko iti panagaramat ti social media tapnu saan a mabiktima iti naduma-duma a kita ti panaggundaway.
Timek ni Police Regianal Office Cordillera Anti-Cybercrime Unit Deputy Chief PLt.Col Divina Mencio
Kabayatanna, kidkiddawen ni Mencio ti panangbantay dagiti nagannak iti aktibidad dagiti annakda iti online.     
Kasaruno daytoy dagiti umad-ado a bilang dagiti menor de edad a maipadpadamag a makipaspaset iti online sexual activities.