BAGUIO CITY–Agtultuloy iti pannakapadur-as ti water use and conservation efforts ditoy Baguio City.
Kasaruno daytoy iti panangipaay ti Department of Budget and Management ti P90 million para iti konstruksyon ti rainwater harvesting facility ti siudad sadiay Camp 8 watershed iti depaar ti Kennon Road.
Sigun kenni Mayor Benjamin Magalong, impanamnama ni DBM Secretary Wendel Avisado iti pannakaipaluspos ti pondo.
Kinunana a babaen iti pannakaaramid ti nasao a proyekto ket maddaan iti epektibo solusyon ti syudad iti parikot ti panagkurang ti suplay ti danum.
Innayunna nga agserbi ti water harvesting facility kas kanayunan a water containment area ken long term solution tapnu masolbar ti pangta ti panagkurang ti danum nga intunda ti bimmabaan ti agdama a pagtataudan ti danum ken inmaduan ti operasyon dagiti illegal deep wells kadagiti nagduduma a paset ti syudad.
Inmunan iti dayta, kinuna ni Mayor Magalong a posible a makapasar iti panagkurang ti suplay ti danum ti syudad iti sumarsaruno a tallo a bulan.
Kabayatana, impanamnama ti Baguio Water District (BWD) a saanen nga agkurang ti suplay ti danum ditoy siudad ita a kalgaw.
Sigun kenni BWD general manager Engr. Salvador Royeca, saan a mapasaran ita a bulan ti panagkurang ti danum kadagiti nangangato a lugar partikular sadiay Upper Pinget, Fairview, Guisad ken Ferguson.
Nupay kasta,inlawlawagna met a naksayan ti suplay ti danum sadiay Tam-awan.
Inaklonna pay a karit ita ti panagkurang ti suplay ti danum kadagiti nangangato a lugar ditoy siudad a posible nga agpaut agingga Abril ken Mayo.
Iti baet daytoy, impanamnamana nga adda latta ti suplay ti danum a maiwaras kadagiti umili.
Iyap-apela pay ni Engr. Royeca iti publiko nga agsalimetmetda iti panagaramat iti danum nangruna iti panawen ti kalgaw wenno dry season.
