BAGUIO CITY – Posible a maisayangkat ti face-to-face learning iti makapat a kwarter ti agdama nga school year 2020-2021 ti nasurok 10 a napili a pagadalan ti elementarya ken sekondarya iti probinsia ti Benguet.
Iti panakiyuman ti Bombo Radyo Baguio kenni DepEd-Benguet Schools Division Superintendent Gloria Buya-ao, kinunana a masarakan dagiti napili a pagadalan kadagiti lugar nga awanan ti kaso ti COVID-19 ken dagiti nabigbig a low-risk areas iti COVID-19 tapnu maipasigurado ti kinatalged dagiti estudyante.
Innayonna nga inkonsiderada metlaeng dagiti nakitada a pagadalan a marigatan a mangisayangkat iti blended learning kas maibasar iti rimwar iti resulta ti insayangkatda a survey.
Sigun kenkuana, manarimaan metten ti panagrikrikosda kadagiti nasao a pagadalan tapnu kitae ti kapasidad dagitoy a mangakomodar kadagiti estudyante ken makita no masurot ti naituding a minimum health standards kontra iti COVID-19.
Imbinglayna a per batch dagiti ubbing a sumrek iti face-to-face learning gaputa 50 percent capacity ti masurot kadagiti pagadalan.
