BAGUIO CITY – Maad-adal ti posiblidad a panakabaliw dagiti border checkpoints pastrek ditoy syudad ti Baguio.
Sigun ken Atty. Althea Alberto, Executive Assistant ken Legal Officer ti City Mayor’s Office, ad-adalendan ti posible a panakaiyakar wenno panakanayon dagiti border checkpoints ditoy syudad.
Inlawlawagna a babaen iti daytoy ket maksayan ti parikot kadagiti checkpoints ken magin-awaan dagiti motorista a sumangsang-at ditoy syudad.
Kasaruno paylang daytoy iti napasaran a parikot partikular iti trapiko kadagiti borders it siudad idi napalpalabas gapu iti kaadu dagiti simmang-at a motorista kagiddan ti napalukayan a travel restictions.
Kabayatanna, impaulog ti lokal a gobyerno ti baro nga entry protocols para kadagiti sumrek ditoy Baguio City nga ag-epekto inton bigat, March 19, aldaw ti Biyernes.
Maibasar iti pagalagadan, nasken a mangiparang iti negative RT-PCR wenno antigen test result a naisayangkat iti uneg ti 72 nga oras sakbay a sumrek iti Baguio wenno maipasidong iti testing sadiay Central Triage iti Baguio Convention Center dagiti non-resident a Private Sector Authorized Persons Outside of Residence nga adda iti official travel, dagiti non-resident travelers a ti panggepda ket agpasyar ditoy Baguio; dagiti turista ken dagiti returning Baguio residents.
