BAGUIO CITY–Isaksakad latta ti lokal a gobyerno ti Baguio ti pooled testing method kadagiti business establishments ditoy siudad.
Sigun kenni City Budget Officer Atty. Letecia Clemente, daytoy ti alternatibo a wagas tapno saan a madagsenan dagiti agpasidong iti RT-PCR test.
Kinunana a dumanon laeng iti P1,000 ti bayadan dagiti lima nga indibidual iti maysa a grupo wenno pool.
Inlawlawagna nga adda ti kondisyon sakbay nga agpasidong dagiti maseknan iti pooled testing ken daytoy ket nasken nga awan ti mapaspasaranda a sintomas.
Maipalagip a ti panakaipatungpal ti pooled testing method ditoy siudad ket babaen iti panagbinnadang ti lokal a gobyerno ken maysa a pribado nga organisasyon.
Immunan nga inadaptar ti Baguio ti nasao a testing method tapno maipangato ti testing capacity ti siudad kas wagas tapno maparmek ti COVD-19.
