BAGUIO CITY–Inaprobaranen ti Sanguniang bayan ti La Trinidad, Benguet ti P27-M a pondo a mailatang para iti vaccination rollout kadagiti umili sadiay.
Sigun kenni Vice Mayor Roderick Awingan, nagtaod ti pondo iti added collection ti ili ita a tawen ken manipud iti supplememtal budget.
Kinunana a P10-M ti mailatang para iti panakagatang ti bakuna bayat a ti nabatbati ket maaramat para iti vaccination program.
Dinakamatna a puntirya ti lokal a gobyerno ti La Trinidad a mabakunaan ti 70% a populasyon ti munisipyo ngem masurot latta dagiti nasken a maipangruna a mabakunaan.
Inlawlawagna a possible a saan nga umdas ti bakuna nga ipaay ti nasyonal a gobierno isut gapuna a nangisaganadan iti maaramat a pondo para iti panakabakuna dagiti umili sadiay.
Innayon ti bise mayor a manarimaan ti masterlisting ti vaccination rollout kadagiti 16 a barangay ti La Trinidad babaen iti tulong dagiti barangay officials, barangay health workers ken barangay nutrition scholars malaksid pay iti online vaccination registration tapnu mapapartak ti panagrehistro dagiti agtarigagay a mabakunaan.
