BAGUIO CITY–Agsagsaganan ti DepEd-Benguet para iti panakaisayangkat ti early registration dagiti estudyante para iti school year 2021-2022 kas maitunos iti pammilin ni Education Secretary Leonor Briones.
Iti interview ti Bombo Radyo Baguio, kinuna ni DepEd-Benguet Schools Division Superintendent Gloria Buya-ao nga ur-urayenda paylaeng ti pinal a pammilin para iti panakaisayangkat ti nasapa a panagparehistro kadagiti estudyante.
Nupay kasta, kinunana a posible a tuladenda ti inaramidda idi napalabas a tawen a ti pre-registration dagiti estudyante ket babaen iti online, text message ken tawag wenno dagiti mismo nagannak ti mangi-enroll kadagiti ubbing tapnu maliklikan ti face-to-face ken panaka-urnong dagiti nagannak ken estudyante kadagiti pagadalan.
Imbinglayna metlaeng a posible a mangisayangkatda manen ti survey kadagiti estudyante no ania ti kayat dagitoy a wagas ti panagadal para iti panakaisimpa ti mas epektibo a wagas ti panagsuro kabayatan ti pandemya.
