BAGUIO CITY–Natiliw ti maysa a gwardia ti Kalinga Provincial Capitol iti buy-bust operation sadiay Purok 6, Bulanao, Tabuk City idi kalman.
Nabigbig daytoy a ni Henry Taya-an Tawatao, 54-anyos, residente ti Nambaran, Tabuk City, Kalinga ken nakalista a High Value Individual.
Nakumpiskar kenkuana ti maysa a pakete ti maatap a shabu nga agdagsen ti agarup 0.85 gram, maysa a cellphone ken maysa a digital weighing scale bayat a narekober kenkuana ti P500 a naaramat a buy-bust money.
ZNaisayangkat ti buy-bust operation kas maysa kadagiti Operations Phase ti Barangay Drug Clearing Program ti PDEA tapnu mapunas wenno maksayan ti suplay ti iligal a droga.
Sumangsango metten ni Tawatao iti kaso a panaglabsing iti Comprehensive Dangerous Drugs Act of 2002.
