BAGUIO CITY – Impannakel ti Baguio City Police Office (BCPO) ti napintas a bunga ti nainget a panagkampanyada kontra iti iligal a droga kasaruno ti panagngato ti datos dagitoy nga adu ti nakumpiskar a droga ken nakemmeg a drug personalities.
Maibasar iti datos ti BCPO, dumanon iti 18 a bilang ti balligi nga operasyon dagitoy manipud Enero aggingga Pebrero a nakatiliwan
ti 28 nga indibidual ken nakakumpiskaran ti 136.11 grams ti maatap a shabu ken 3.10 grams a marijuana nga agatad iti P926,000.
Sigun kenni P/Lt/Col. Greg Amiyao, Deputy Chief ti BCPO, nangatngato daytoy no idilig iti operasyon nga insayangkatda idi napalabas a tawen ti kapada a bulan a nakakkemegan ti 28 nga indibidual ken nakakumpiskaran ti 28.94 grams ti maatap a shabu nga aggatad iti agarup P197,000.
impanamnamana met a saan nga agpatingga ti panagkampanyada aggingga a madalusan ti entero a siudad manipud iti iligal a droga.
