BAGUIO CITY–posible a maisubli iti Department of Health-Central Office dagiti sobra a bakuna kontra COVID-19 a saan a maaramat ti rehiyon Cordillera kas panagtungpal iti pammilin nga impaulog ti National Immunization Task Group.
Sigun kenni Department of Health-Cordillera Assistant Regional Director Dra. Amelita Pangilinan, nakaawat dagitoy iti pammilin manipud iti nasao nga ahensiya idi Sabado seknan iti pannakaisubli dagiti sobra a bakuna tapnu maiwaras sadiay Metro Manila.
Nupay kasta, kinunana a nakadependar latta iti Regional Office ti desisyon nangruna ta agingga ita ket agtultuloy paylaeng ti vaccine roll-out iti rehiyon.
Patienna a naaramid laeng daytoy a pammilin tapnu mapapartak ti pannakaiwaras ti panakaaramat dagiti bakuna kontra iti COVID-19.
Kabayatanna, impettengna a puntiryada a maiwaras amin ita nga aldaw dagiti bakuna kontra COVID-19 kadagiti nagduduma a probinsiya iti rehiyon Cordillera.
