BAGUIO CITY–Dumanonen iti 10% ti case fatality rate ti UK variant iti COVID-19 iti Cordillera kasaruno ti pannakailista ti rehiyon iti uppat nga ipupusay gapu iti nasao a sakit.
Dinakamat ni Department of health-Cordillera Assistant Regional Director Dra. Amelita Pangilinan a manipud iti 41 nga indibidual a nagpositibo iti UK variant ket 32 kadagitoy ti naimbagan bayat a lima met ti agpapaimbag.
Mainaig iti dayta, inwaragawagna a 1,187 ti pakabuklan a bilang dagiti nabigbig nga indibidual a nakapulapol dagiti nagpositibo iti nasao a sakit partikular iti umuna agingga maikatlo a generation close contact dagitoy.
Kinunana a manipud iti nasao a bilang, nasurok sangaribu wenno 85% dagiti naimbagan bayat a manarimaan pay laeng ti quarantine ken isolation period kadagiti daduma.
Nupay kasta, impettengna nga awanen ti nailista a baro a kaso ti UK variant iti rehiyon Cordillera.
