BAGUIO CITY – Inwaragawag ti Diocese of Baguio a maituloy dagiti naituding nga aktibidades ti simbaan-katolika para iti semana santa bayat nga awan pay ti pammilin nga impaulog ti lokal a gobyerno ti siudad seknan iti daytoy.
Sigun kenni Bishop Victor Bendico ti Diocese of Baguio ken Benguet, maisayangkat dagiti kadawyan a selebrasyon nga ar-aramiden ti simbaan kas iti misa a mangrugi inton march 28 (Palm Sunday) agingga april 4 (Easter Sunday).
Kinunana nga immunan a naiwaragawag ti pannakakanselar ti selebrasyon ti semana santa sadiay Metro Manila gapu iti panagngato ti kaso ti COVID-19 ken dadduma pay a variants sadiay.
Nupay kasta, kinunana a posible met nga adda ti pagbaliwan ti plano dagitoy iti kanito a mangipaulog iti pammilin ni Mayor Benjamin Magalong.
Impanamnamana met a kabayatan ti selebrasyon ti Holy Week ket maipatungpal ti 50% capacity ken nainget a masurot dagiti minimum health standards.
Inlawlawagna met a maipatangatang iti facebook page ti Diocese of Baguio ken iti DZWX Bombo Radyo Baguio dagiti aktibidades nga isayangkat dagitoy para kadagiti indibidual a saan a maakomodar ti nasao a simbaan
ni Bishop Victor Bendico manipud iti Diocese of Baguio
Kabayatanna, nangipaulog metten iti pammilin ni Mayor magalong a mangitudtuding iti 30 percent a capacity kadagiti relegious gathering iti siyudad manipud iti sigud a 50 percent.
