BAGUIO CITY – Pimmusay ti maysa nga indibidual bayat a nadangran ti tallo a kameng ti CAFGU iti napasamak nga aksidente iti nagbaetan ti maysa a tricycle ken maysa a motorsiklo iti barangay road sadiay Macutay, Rizal, Kalinga idi kanikadua.
Nabigbig ti pimmusay a ni Leoncio Basco, 56-anyos, pasahero ti tricycle bayat a nabigbig dagiti nadangran a da Sammy Despaledares, driver ti tricycle ken da Jundel Corpuz, driver ti motorsiklo ken Loreto Tambo, backrider ti motorsiklo, no sadino, bin-ig a miembro ti CAFGU dagiti Despaledares, Corpuz ken Tambo.
Maibasar iti report, paturong iti direksion ti Liwan East ti tricycle ngem bayat ti kaaddada iti kalsada ket agidde-iddep agingga a killaat a simmardeng.
Nagresulta daytoy iti panakaidungpar ti sumarsaruno a motorsiklo iti likod ti tricyle.
Sigun met kenni PSSg. Henry Jr., imbestigador ti Rizal Municipal Police Station, maatap nga adda iti impluwensia ti arak dagiti nasao nga indibidual.
Innayonna a gapu iti kapigsa ti aksidente ket naipurwak ni Basco paruar iti tricycle ken naitama ti ulo daytoy iti kalsada.
Maitaray dagiti da Basco, Corpus ken Tambo iti ospital ngem naideklara a dead on arrival ni Basco bayat nga agpapaimbagen dagiti dua a nagsagrap ti dunos ken gasgas iti ulo.
