BAGUIO CITY – Natiliw ti dua nga indibidual kalpasan a naipatungpal ti maysa a search warrant iti pagnanaedanda a maatap nga agserserbi a drug den sadiay Middle Rock Quarry, Baguio City idi rabii.
Nabigbig dagitoy a da Joriel Torio ken Jhiral Baustista.
Nakumpiskar manipud iti nasao a pagtaengan ti pito a pidaso ti maatap a shabu, nagduduma nga illegal drug paraphernalia, pakairamanan ti tooter ken pakete nga addaan ti mapapati a shabu residue.
Kinuna dagiti otoridad a dagiti nadiskobre iti pagnanaedan da Torio ken Bautista ti pammaneknek nga agilaklako ken mangiserserbi dagitoy iti iligal a droga kadagiti sangailida.
Iti agdama, sumangsangon dagiti dua iti kaso a panaglabsing iti Comprehensive Dangerous Drugs Act of 2002.
Inkari met ni PDEA-Cordillera regional director Gil Castro nga agtultuloy ti kapada nga operasyon agingga a mapaksiat ti panagraira ti iligal a droga ditoy rehion Cordillera.
