BAGUIO CITY – Tarigagay ti maysa a private mobility company nga iyemplementar ditoy Baguio City ti maysa nga Smart City Project nga aggatad ti P2.2-B ken paka-aramatan ti artificial intelligence para iti contactless a panakatiliw dagiti aglablabsing iti linteg trapiko ken iti panakaimaton ti trapiko.
Sigun iti opisyal ti nasao a kompanya ken sigud a Transportation Undersecretary Mark Richmond de Leon, mangimuntar ti kompanyada iti agarup 220 a high-definition cameras kadagiti mapili a disso iti aglawlaw ti siudad tapnu maipasigurado ti panakatungpal ti proyekto.
Kinunana a makatulong ti state-of-the art nga Smart City system iti epektibo ken napartak a panangaksion ti lokal a gobyerno iti panakaimaton ti trapiko ken panakaimplementar ti linteg trapiko a mangigiya kadagiti mammanday linteg iti panangbukelda iti umno a polisiya para iti pagsayaatan dagiti umili ti Baguio.
Maipalagip a naawat ti lokal a gobyerno ti siudad ti dumanon P200-M manipud iti Office of the President tapnu mapunduan ti panaka-aramid ti state-of-the-art command center a paset ti Smart City Project ti Baguio a paka-aramatan ti artificial intelligence.
Maitunos daytoy iti panggep ti agdama a mayor a panagbalin ti Baguio a kaunaan nga Smart City iti pagilian.
