BAGUIO CITY – Nailista ti Lagawe Municipal Fire Station sadiay Ifugao ti kangatoan a koleksion iti Fire Code Revenue iti uneg laeng ti dua a bulan iti baet ti mapaspasaran a pandemya.
Sigun kenni Lagawe Fire Station Information Officer FO1 Keith Bautista, nakakolektarda iti nasurok P504,000 a fire revenue collections iti umuna a dua a bulan ti agdama a tawen.
Kinunana a nangatngato daytoy no idilig idi napalpalabas a tawen gaputta nakakolekta laeng dagitoy iti nasurok P540,500 a fire revenue iti uneg ti makatawen.
Impannakkelna met a naballigi ti panangisayangkatda iti inspeksyon kadagiti 653 nga establishimiento sadiay Lagawe, Ifugao iti naglabas a dua bulan no idilig iti 677 nga establishimento idi napalabas a tawen.
Imbinglayna pay ti baro a responsibilidad ti Bureau of Fire Protection iti sidong ti Oplan Ligtas Pamayanan no sadino ditoy nga agrikrikosda kadagiti babbarangay tapnu iwaragawag ken ipakaammo dagiti fire safety awareness and tips kadagiti umili.
