BAGUIO CITY – Balligi a nakemmeg ti maibilbilang kas No.5 Top Most Wanted Person iti Provincial Level ti Kalinga sadiay Tam-awan Village, Baguio City itay laeng nabiit (Abril 4).
Nabigbig ti suspek a ni Arthur Calading Ao-as, 47 anyos, construction worker ken residente ti Barangay Babanoy, Tanudan, Kalinga.
Maibasar iti report, maatap nga inaramid ni Ao-as ti krimen a murder idi tawen 2006 sadiay Tanudan, Kalinga ken naglemmeng iti uneg ti agarup 15 nga tawen.
Sigun iti Tanudan Municipal Police Station, nakaawatda iti awag seknan iti lokasyon ni Ao-as isu’t gapuna a dagusda nga inkoordinar iti Regional Intelligience Division ti PROCOR ken iti BCPO nu sadinno nangisayangkatda met iti surveillance ken monitoring sadiay Tam-awan Village, Baguio City.
Ditoy a nakemmeg ti suspek sadiay Purok 3, Barangay Pinsao Proper, Tam-awan Village babaen iti bileg ti warrant of arrest nga naiserbi kenkuana.
Kabayatanna, nadiskobre ti P2.160-M a gatad ti marijuana iti tallo nga plantasyon sadiay Tabuk City, kalinga idi kalman.
Maibasar iti report, dumanon iti 10,800 a pinuon ti marijuana ti balligi nga dinadael ken inuram dagiti otoridad kadagiti nasao a plantasyon ti marijuana.
