BAGUIO CITY – Nagpositibo iti COVID-19 ti lima nga opisyales ken tallo nga empleyado ti municipyo Kabayan, Benguet.
Iti panakiuman ti Bombo Radyo Baguio, kinuna ni Kabayan Mayor Basilio Louie Dao-al Jr. a karaman daytoy kadagiti opisyales a nagpositibo iti COVID-19 nu sadinno naipasidongen iti maysa nga isolation facilities sadiay.
Nupay kasta, impamnamana a natalged ti kasasaadna iti agdama gaputa asymptomatic daytoy ken ilepleppasna laeng ti 14-day quarantine.
Atapenna a nakaptan iti COVID-19 kalpasan a nagatendar iti lamay daydi mayor Faustino Aquisan gaputa addu dagiti bisita nga inasikaso sadiay.
Impasiguradona met nga agtultuloy latta ti operasyon ti municipyo ti Kabayan, Benguet gaputa mangisaysayangkat dagitoy iti skeletal work force tapnu saan a maaberya wenno mataktak ti serbisyo a maipaay kadagiti umili sadiay.
Iti agdama ket dumanon iti 50 a bilang ti aktibo a kaso ti COVID-19 iti nasao a municpyo ngem impamnama ti mayor nga umdas dagiti isolation facility sadiay a mangakomodar kadagitoy.
Kabayatana, dinakamat ni Dao-al a pormalen nga agserbi daytoy kas mayor ti Kabayan, Benguet kalpasan a nagsapata iti opisina ni Governor Melchor Diclas idi Marso 29 ti agdama a tawen a kasukat daydi mayor Faustino Aquisan.
