BAGUIO CITY – Nagbalin a nabara ti diskusyon ti lokal a konseho ti Baguio seknan iti kiddaw a saanen a panagaramat ti faceshield kadagiti magmagna nga indibidual.
Kiniddaw ni Councilor Benny Bomogao ti saanen a panagaramat ti faceshield dagiti magmagna iti nagduduma a lugar nangnangruna no addada iti open spaces gapu iti kaadu ti reklamo a maaw-awatda.
Impettengna a saanen a kasapulan ti face shield gaputa nakapoy ti panakaiyakar ti coronavirus kadagiti open spaces no idilig iti merkado publiko, parke ken dadduma pay a natatao a lugar.
Nupay kasta, tinubngar ni Councilor Joel Alangsab, chairman ti Committee on Health ti nasao a singasing ken impettengna a kasapulan latta ti panagsuot ti face shield tapno saan a naan-anay a ngumato ti kaso iti COVID-19 iti siudad.
Impettengna metlaeng a kasapulan a pagtalinaeden ti maipatpatungpal a pagaladan gapu iti nakaro nga epekto ti COVID-19.
Innayonna a maipabiang met ti implementasyon ti pagalagadan kadagiti law enforcers isut gapuna a dagitoyen ti makaamo iti daytoy.
Inwaragawag pay Councilor Alangsab ti panangipaay ni Councilor Bomogao iti numerona kadagiti agrekreklamo tapno mismo a daytoy ti mangilawlawag iti kinapateg ti panagsuot ti face shield.
Gapu iti daytoy, napagnunumuan ti konseho a pagtalinaeden ti nasao a pagalagadan ken maamyemdaran laeng daytoy iti kanito nga adda iti mapasamak a dakes nga insidente.
