BAGUIO CITY – Malamlamayan ita ti maysa a pulis kalpasan nga aksidente a napaltoganna ti bukodna a bagi sadiay Lugo, O-ong, Hingyon, Ifugao idi kalman.
Nabigbig daytoy a ni Pat. Jonathan Ballogan, 31-anyos, baro, nakadestino iti Regional Mobile Force Batallion 15 ti Cordillera Police.
Maibasar iti report, maatap a daldalusan ti nasao a pulis ti paltogna iti kalapaw dagitoy idi napasamak ti insidente.
Immuna iti daytoy, naammuan a kiniddaw ti nasao a pulis iti lola na nga itulodanna daytoy iti taraon.
Ditoy metten a nakanggeg dagiti kakabagianna iti kanalbuong ti paltog manipud iti nasao a kalapaw.
Dagus met a napan dagiti kakabagianna ken sadiay a nakitada ti pulis a dara-dara ken nakadasay.
Dagus nga intarayda daytoy iti ospital ngem saanen a nakalasat.
