BAGUIO CITY – Palpalagipan ti Department of Health (DOH)-Cordillera dagiti vaccination units iti rehiyon a kompletoenda a bakunaan dagiti indibidual a karaman iti listaan ti Priority A1 kas kadagiti health workers.
Inyunay-unay ni DOH-CAR Regional Director Dr. Ruby Constantino a kasapulan a mabakunaanen ti puntirya a bilang dagiti frontliners gaputa inaprobaranen ti Food and Drug Administration ti panakaibakuna ti SINOVAC vaccine kadagiti Priority A2 wenno natataengan.
Inlawlawagna a babaen iti daytoy ket maamoan nu adda ti sumobra a bakuna a mabalin a maaramat kadagiti natataengan a sumaruno a mabakunaan gaputa awan paylaeng ti kanayonan a SINOVAC vaccine a nailatang iti rehiyon.
Maipalagip a dumanon iti 40, 900 a doses ti bakuna nga SINOVAC ken Atrazenica ti naipaay iti rehiyon Cordillera.
Maibasar iti datus ti DOH-CAR, balligi a nabakunaan ti 63% a health workers manipud iti puntirya a 40,546 Priority A1 a mabakunaan kontra iti COVID-19.
Manipud iti nasao a populasyon, 93.27% a health workers ti nabakunaan sadiay Baguio City, 67.83% sadiay Benguet, 65.12% sadiay Kalinga ken Abra, 58.11% sadiay Mt Province; 51.78% sadiay Apayao bayat a 34.09% met sadiay Ifugao.
