Pimmusay ti lima nga indibidual idi kalman iti napasamak a pammaltog iti Christian school idiay Madison, Wisconsin agraman ti “shooter” wenno nangpaltog, sigun kadagiti otoridad.
Napasamak ti pammaltog iti Abundant Life Christian School, maysa a pribado nga institusion a mangisursuro iti agarup 400 nga estudiante manipud kindergarten agingga iti maika-12 a grado, kinuna ti Madison Police Department.
Iti press conference ni Madison Police Chief Shon Barnes, kinumpirmarna a lima ti pimmusay iti insidente agraman ti mapapati a nangpaltog a nabigbig kas maysa a juvenile a nasarakan dagiti kameng ti pulisia a natay idi simmangpetda iti pagadalan.
Saan pay a naammuan ti kinasiasino ti nangpaltog.
Iti pakaistoryaan ti Estados Unidos, kangrunaan a pakaseknan iti panagkontrol ti paltog ken kinatalged dagiti pagadalan nu sadinno, ngimmato ti bilang ti “school shootings” iti napalabas ken agdama a tawen.
Maibasar iti rekord ti K-12 School Shooting Database website , dumanon iti 322 nga “school shootings” ti napasamak iti agdama a tawen.
Daytoyen ti maikadua a kangatuan iti aniaman a tawen sipud idi 1966.
