Maysa a kangrunaan a kidkiddawen dagiti maseknan nga opisyales idiay Irisan, Baguio City ti panakaileppas ti multi-purpose building iti nasao a barangay iti kabiitan a panawen.
Iti panakiuman iti Bombo Radyo kenni Ester Litilit, kagawad iti Irisan Barangay, idi pay 2022 ti naituding a panakaiturn-over iti nasao a barangay hall ngem naitantan daytoy rason a kinunana nga inan-anusanda.
Sigun kenni Kagawad Litilit, mangnamnamada a maileppas ti barangay hall ita a tawen tapno makaakardan ken maakomodarda dagiti bumarangay nga addaan iti pakaseknan iti mas komportable a lugar wenno aglawlaw.
Kagiddan dayta, impetteng ti opisyal nga umakar laeng dagitoy nu maminpinsan a malpas ken maipaima kadakuada ti nasao a pasilidad gapu ta kayatda metlaeng a masigurado ti kinatalged ti inda pagakaran.
Mainaig iti dayta, dinakamat ti opisyal nga awan ti inar-aramidda a resolusyon seknan iti panakarebisa iti barangay hall, kasta met nga awan ti inaramid ti naglabas a Sangguniang Barangay.//Bombo Rob Dominguez
