Posible a makasuan iti frustrated murder thru stabbing iti Family Court ti dua a menor de edad kalpasan a binagbagsulda ti 16-anyos nga estudyante a residente iti Slaughterhouse Compound, Baguio City.
Iti pannakiuman ti Bombo Radyo kenni PMAJ. Marcee Marron, pannakangiwat ti Baguio City Police Office kinunana a napasamak ti insidente idi March 04, 2025 partikular iti exit ti jade well parking area, Harrison Carantes Barangay, Baguio City.
Dagiti suspek ket agpada nga agtawen iti 15 no sadino, maysa kadagitoy ket Grade 7 student, residente iti Zamora Street, Baguio City bayat a maysa ket out of school youth ken residente iti Busol Ambiong, Baguio city.
Maibasar iti inisyal nga imbestigasion ti pulisia, kinamat dagiti nasao a suspek ti biktima a kadwana dagiti barkadana manipud iti Rizal park agingga iti nakapasamakan ti insidente.
Nadanun dagiti suspek ti biktima ken pinagtitinnulanganda a binugbug, sakbay a binagbagsol ti suspek nga out of school youth iti likodan daytoy.
Kalpasan ti insidente, timmaray dagiti suspek ngem natiliw metlaeng dagitoy babaen iti opisial ti Public Order and Safety Division ken hot pursuit nga inpatungpal dagiti Polis.
Iti agdama, agpatpataming paylaeng ti biktima iti Ospital.
Kabayatanna, immet itan ti Mobile Police Unit iti Burnham Park dagiti suspek.
Manarimaan metten a maisagsagana ti discernment document ken posible a maiturong dagiti suspek iti Bahay Pag-asa apaman a makompirmar kabayatan ti prosecution nga ammo dagiti suspek a maysa a basol ti inaramid dagitoy.//Bombo Noveh Organo
