Inlawlawag ti maysa nga opisial ti International Criminal Court nga awan ti kasapulan a bilang dagiti kaso tapno maibaga kas “crime against humanity”—mabalin nga umdasen ti maysa laeng a kaso.
Sigun iti pannakangiwat ti International Criminal Court a ni Fadi El Abdallah, ti pammapatay iti siasinnoman wenno ti panggep a pakairamanan ti “systematic recurrent attack” kontra iti civilian population, uray ti maysa a pammapatay ket mabalin a maibilang a krimen maibusor iti sangatauan.
Kasaruno daytoy ti panagkuwestunar ni Vice President Sara Duterte kadagiti ebidensia a naiparang kontra iti amana a ni sigud a President Rodrigo Duterte mainaig kadagiti mapapati a “crimes against humanity” a maipapan iti extrajudicial killings iti sidong ti administrasionna.
Kinumpirmar ti legal team ni Duterte a nakaawatda iti dokumento a nakalanadan ti 181 items of evidence kontra kenkuana.
Sigun kenni Vice President Duterte, mabalin kadi a maibilang kas crime against humanity ti 181 items of evidence, ken inyebkasna a saan a patas daytoy para iti agtawen ti walo pulo a tao.
Nupay kasta, kinontra dagiti eksperto iti linteg a ti tawen ket awan pakainaiganna kadagiti “trial” ti ICC ken saan a kasapulan ti pananginagan iti amin a biktima.
Kinarit pay ni Kristina Conti, maysa nga abogado a mangibagi kadagiti biktima ti extrajudicial killing, ni Vice President Sara Duterte seknan iti statament daytoy.
