BAGUIO CITY- Nagpositibo iti panagaramat iti iligal a droga ti maysa kadagiti uppat a suspek a nakemmeg sadiay South China Sea Green Valley Subdivision kalpasan ti eksaminasyon a naipatungpal kadakuada itay laeng nabiit.
Bayat a ti tallo a kadua daytoy a pakairamanan ti maysa pulis ket nagnegatibo iti panagaramat iti iligal a droga.
Maipalagip nga idi napalabas a bulan ket naipisok iti pagbaludan dagiti uppat a suspek kalpasan a nakumpiskar kadakuada ti 20 a kilo ti maatap a shabu nga aggatad iti P136 million.
Balligi ti nasao nga operasyon babaen iti nagtipon a pwersa dagiti personnels manipud ken Philippine Drug Enforcement Agency (PDEA) ken Philippine National Police (PNP) a nagresulta iti pannakakemmeg dagiti uppat a suspek.
Maysa kadagiti nakemmeg ti maysa a Police Executive Master Sergeant, 45-years old , miembro ti Baguio City Police Office ken residente iti nasao a lugar.
Karaman metlaeng kadagiti naarestar ti maysa a babae a sales master, 49 years old manipud Dontogan, Baguio City; maysa a tattoo artist, 38-years old manipud Valenzuela City, ken maysa a mekaniko, 37 years old manipud San Juan, Agoo, La Union.
Iti immunan a pannakiuman ti Bombo Radyo kenni Derrick Arnold C. Carreon, Regional Director ti PDEA-Cordillera, kinunana a dagiti suspek ket high-value drug personalities ken nabayagen a mabambantayan.
Iti agdama, sumango dagiti suspek iti kaso a panaglabsing iti section 5 ken section 11 ti Republic Act 9165 wenno ti Comprehensive Dangerous Drugs Act of 2002.
