Agtultuloy latta ti Information, Education and Communication campaign dagiti maseknan nga opsiyales idiay Barangay Happy Hallow, Baguio City seknan iti umno a panagsegregate iti basura para iti sustainability daytoy.
Iti panakiuman iti Bombo Radyo kenni Esperanza Damian, Kagawad iti Barangay Happy Hallow, naobserbaranda met a masegsegregate dagiti basura iti nasao a barangay nu sadino, ar-aramatenda pay daytoy a pagpataudan iti pamastrekan.
Malaksid iti dayta, kinuna ni Damian a manmano laeng dagiti makolkolektarda a food wastes gapu ta kadawyan a maipakpakan dagitoy kadagiti dingwen, bayat a maiderderetso met kadagiti puon iti mula, compost bin ken compost pit dagiti nagukisan kadagiti nateng ken dagiti prutas.
Nupay kasta, imbinglay ni Damian a saan pay a kasapulan iti nasao a barangay nga agaramat iti communal compost pit gapu ta kaadwan kadagiti residente ket addaan kadagiti backyard gardens ken pagmulaan wenno farm.
Kabayatanna, kas paset iti value chain analysis iti Circular Economy iti Baguio City nu sadino, naaramat ti indigenous approach iti Barangay Happy Hallow, kinuna ni Damian a nainsigudanen nga ar-aramidenda dagiti sumagmamano a praktis kas iti pagaramat iti maysa a banag nga awan iti maibasura ken ti pangaramat kadagiti recyclable ken reusable agingga a saanen mapagnumaran pay dagitoy.
Mainaig iti dayta, iti baet a bassit ti mapapataud a food wastes iti nasao a barangay, inaklon ti kagawad a maysa a pakaseknanda dagiti saan a bumarangay iti Happy Hallow nga agibelbelleng kadagiti basurada partikular iti food wastes nu sadino, addan ti natiliwanda wenno naaktwanda iti daytoy.//Bombo Rob Dominguez
