Agtaltalinaed a pakaseknan paylaeng ti Barangay Santo Tomas School area ti panangimplementar ti ordinansa wenno pagalagadan iti siudad ti Baguio.
Daytoy ket gapu iti “land boundaries” a nabayag a parikutda.
Iti pannakiuman ti Bombo Radyo kenni Barangay Captain Laurence Donato, idi paylaeng a parikutda ti nasao a banag, ngem ita laeng a panawen nga impaayan ti Baguio City Council ti atension ti nasao a banag bayat ti regular session dagitoy.
Naidatag gamin iti regular session ti Memorandum of Agreement ti “land swapping,” ngem naitantan daytoy gaputa kasapulan pay nga ikonsidera ti pakaseknan ti nasao a kapitan.
Sigun iti kapitan ti nasao a barangay, ti Santo Tomas School area ket naipasdek iti masakupan ti munisipyo ti Tuba, Benguet.
Para kenkuana, nu adda ti pagalagadan ti siudad ti Baguio a sabali iti munisipyo ti Tuba, patienna a maaddaan a talaga ti “conflict.”
Numan pay saan nga amin a masakupan ti nasao a barangay ket naala ti munisipio ti Tuba, adda met latta dagiti residente wenno babbalay a nakarehistro iti Tuba, Benguet.
Inaklonna nga immanamong met ti munisipio ti Tuba ken dagiti residente iti mapangpanggep a “land swapping.”
Kabayatanna, maibasar iti impormasion a naala ti Bombo Radyo, dumanon iti 142, 249 sqm ti lote ti Baguio City ti mai-swap ti munisipio ti Tuba, Benguet, bayat a dumanon met iti 186,803 sqm ti lote ti Tuba ti mai-swap ti Baguio City.//Bombo Noveh Organo
