Nakumpleton amin dagiti bado nga aramaten dagiti senador para iti impeachment trial ni Vice President Sara Duterte ken agur-uray laeng iti maudi a pannakaideliver daytoy, sigun kenni Senate Secretary Renato Bantug Jr.
Kinuna ni Bantug nga aggatad ti agarup P7,000 ti tunggal bado.
Immuna nga inruar ni Senate President Francis “Chiz” Escudero ti umuna a timetable para kadagiti wagas a mainaig iti impeachment trial ni Duterte, a nangikeddeng iti “tentative” a panangrugi ti “trial” inton Hulio 30.
Nu masurot ti timeline ni Escudero, maiparang ti Articles of Impeachment inton Hunio a dos wenno inton mairugi manen dagiti session ken maayaban ti impeachment court iti sumaruno nga aldaw.
Maipalagip a naimpeach ni Vice President Duterte idi Pebrero a singko iti House of Representatives, nga addan ti nasurok dua gasut a mammanday-linteg a nangiyendorso ti reklamo.
Kabayatanna, nangipila ni Duterte ti petision iti Korte Suprema a mangkarit ti kinabalido ti impeachment complaint.
