Idagdagadag ni House Deputy Minority Leader ken ACT Teachers Party List Representative France Castro iti National Security Council a nagananna dagiti kandidato nga agngayngayangay iti midterm elections a mapapati nga umaw-awat iti suporta manipud iti gobierno ti China.
Daytoy ket kalpasan a kinuna ni NSC Assistant Director General Jonathan Malaya iti Senado nga adda dagiti pagilasinan a maisaysayangkat ti China ti information operations nga inisponsoran ti China ken makibiang iti masungada nga eleksion.
Kiniddaw pay ni Castro ti naing-inget nga imbestigasion seknan iti nasao a banag.
Kabayatanna, indagadag pay ti mammanday-linteg kadagiti botante nga agbalin a nasiput ken saanda a suportaran dagiti kandidato a mapapati a supsuportaran dagiti ganggannaet.
Maipalagip a pinaglibakan ti Foreign Ministry ti China dagiti alegasion, ken kinuna ti China a saan nga interesado iti pannakibiang iti eleksion ti Pilipinas.
