Al-allukoyen ni Councilor Rocky Aliping, ABC President ti siudad dagiti amin a barangay officials a no mabalin ket agbalin dagitoy nga apolitical wenno non-partisan iti laksid a mabalin dagitoy nga agkampanya.
Iti panakiuman ti Bombo Radyo kenni Aliping, kinunana a nagbalin a katulongan ti Commission on Elections-Baguio dagiti barangay officials para iti panakaiwaras ti Voter’s Information sheet nupay kasta ket simmardeng daytoy gapu iti nagduduma a rason.
Sigun kenni Aliping, sumagmamano a barangay ket saanda a kayat a mangiwaras iti Voter’s Information sheet bayat nga adda dagiti damag a sumagmamano a babbarangay ket karkargaanda ti nasao a VIS iti daduma a polyetos dagiti kandidato.
Inyunay-unay met ni Aliping a maysa karbengan dagiti barangay officials nga agkampanya no pay kasta rumbeng nga amin a kandidato nga agturong kadagiti babbarangayda ket pasangbayenda wenno i-accomodateda dagitoy.
Kabayatanna, saan kuma nga aramaten dagiti barangay officials daytoy a gundaway tapno agkiddaw iti tulong kadagiti kandidato para iti proyektoda.
Mangnamnama met ni Aliping a kadagiti amin a kandidato a mangabak a saanda nga an-anek-eken dagiti panagkampanya dagiti barangay officials kadagiti sumagmamano a kandidato wenno saanda nga agbales.
