Kidkiddawen ni Atty. Catalino Generillo Jr. iti Korte Suprema (SC) a paglibakan ti motion for extension nga impila ti Office of the Solicitor General (OSG) seknan ti impilana a petision mainaig iti impeachment trial ni Vice President Sara Duterte.
Iti uppat a panid nga oposision a napetsaan idi Mayo a nuebe, impaganetget ni Generillo a ti Korte Suprema ti nangibilin iti Senado nga agkomento iti petision iti uneg ti “non-extendible period” a sangapulo nga aldaw.
Inkalinteganna pay a ti motion for extension ket maipawil iti sidong ti Section 12 ti 2019 Amendments to the 1997 Rules of Civil Procedure.
Maipalagip nga idi Pebrero, nangipila ni Generillo iti petision a mangkikiddaw iti Korte Suprema a piliten ti Senado a dagus nga agtitipon kas impeachment court ken rugian ti “trial” ni Vice President Duterte.
Iti agdama, awan pay ti komento ti Office of the Solicitor General (OSG) seknan iti nasao a banag.
