Temporaryo a mairekep ti Philippine Military Academy kadagiti turista manipod ita nga aldaw agingga inton bigat (Biernes agingga Sabado) para iti panakaangay iti graduation activities iti Philippine Military Academy SIKLAB-LAYA Class of 2025 idiay Fort Del Pilar, Baguio City.
Immunan a naiyam-ammo dagiti Top 10 Performing Cadets ti SIKLAB-LAYA Class of 2025 babaen iti panagmartsa dagitoy idi May 7 kabayatan ti Kapihan sa PMA a paset iti 2025 Graduation Activities.
Nabigbig kas top 1 i anak ti vendor ken sigud a driver iti taxi a ni Cadet First Class Jessie Jr Ticar manipud Quezon City; top 2 ni Cadet First Class Murthan P. Zabala manipud Cebu City; top 3 met ni Cadet First Class Joana Marie Viray manipud Pasay City.
Nabigbig kas top 4 ni Cadet First Class Carlo Badiola manipud Camarines Sur, top 5 ni Cadet First Class Jetron Giorgio Nazareno manipud Oriental Mindoro, top 6 ni Cadet First Class Kobe Jo Ann Pajaron manipud Negros Oriental, top 7 ni Cadet First Class Malvin Brian Dapar manipud Bohol, top 8 ni Cadet First Class El Zur Salon manipud Nueva Vizcaya, top 9 ni Cadet First Class Aprilyn Magsigay manipud Agusan del Sur, bayat a top 10 met ni Cadet First Class Kristine Kate Senados manipud Zamboanga Sibugay.
Dagiti nasao a kadete ket maibilang kadagiti nagduduma a sangay iti Armed Forces of the Philippines kas ti Philippine Army, Philippine Air Force, ken Philippine Navy.
Kabayatanna, malaksid kadagiti Top 10 Performing Cadets, nagmartsa metlaeng dagiti daduma a kadete nga addaan pammadayaw kas ti Chief of Staff Saber, Chief Justice Saber, Superintendent Saber, Athletic Saber (lalaki ken babae), Journalism Award, Mathematics Plaque, SPDU Plaque, DTO Plaque, Starman, ken dagiti Latin honors awardee.
Dagiti agturpos ita iti Philippine Military Academy SIKLAB-LAYA Class ket dumanon iti 266 a kadete a buklen iti 212 lallaki ken 54 a babbae.
Iti nadakamat a pakabuklan a bilang, 137 ti mapan iti Philippine Army, 58 iti mapan iti Philippine Air Force, ken 71 ti mapan iti Philippine Navy.
