Mapalpalagipan dagiti amin a kandidato, nangabak man wenno saan a mangisubmitir iti Statement of Contributions and Expenditures (SOCE).
Iti panakiuman ti Bombo Radyo kenni Atty. Julius Torres, Regional Director iti Commission on Elections Cordillera, kasapulan a mangisubmitir dagiti kandidato iti Statement of Contributions and Expenditures (SOCE) dagitoy tapno makita no kasano iti nagbalin a panaggastosda iti elesyon.
Daytoy ket tapno masigurado a saan dagitoy a nag-overspending.
Sigun kenni Atty. Torres, awan siguro ti kandidato a basta naggastos a saanna nga ilislista dagiti expensesna.
Mamati daytoy a tunggal kandidato ket adda rekordna kadagiti nagastos iti posters, kadagiti nagbalin a supporters ken kadagiti naaramat iti taraon.
Kinunana ni Atty. Torres a kadawyan a dagiti saan a mangisubsubmitir iti Statement of Contributions and Expenditures ket dagiti naabak gapu ta siguro ket masadutanda.
Ngem, inlawlawagna a dagiti saan a makasubmitir ket maipaayan iti administrative fine ken kas bilang tumarayda manen iti sumaruno nga eleksyon ket posible a madiskwalipikarda.
Ti forms iti Statement of Contributions and Expenditures (SOCE) ket downloadable iti website ti Commission on Elections wenno mabalin a bisitaenda ti opisina ti COMELEC.
Naituding a ti maudi a submission iti SOCE ket inton Hunyo a onse iti agdama a tawen.
