Naiyawiden iti lugarda idiay Nueva Ecija ti bangkay ti agtawen iti 22 a lalaki a maatap a nangkettel iti bukodna a biag.
Ti nasao a bangkay ket nasarakan ti agtagikua iti balay a pagdagdagusan iti lalaki idiay Honeymoon Road, Baguio City itay laeng nabiit.
Iti impormasyon a naala iti Bombo Radyo manipod kadagiti kameng iti pulisya, impakaammo kadakuada ti maysa a barangay kagawad ti maatap a kaso iti panagpakamatay.
Kasaruno dayta, nagturong dagiti kameng iti Police Station 6 iti nadakamat a lugar ngem nadanunanda a naka-lock ti silid ti lalaki.
Pinilit ngarod a linukatan dagiti rimmesponde ti naka-lock a silid bababen metlaeng iti panangipalubos iti agtagikua iti pasdek ken dagiti opisyales iti maseknan a barangay.
Dita metten a nakitada ti bagi ti lalaki nga awananen iti signs of life.
Miabasar iti panangiladawan dagiti otoridad, ti lalaki a saanen nainaganan ket nasarakan a nakatugaw iti datar iti asideg iti bunk bed daytoy nu sadino, nakaputiput ti maris brown a leather belt iti tengngedna a nakatali met iti kayo nga agdan ti nadakamat a katri.
Mainaig iti dayta, imbinglay ti agtagikua iti boarding house a nadanagan daytoy idi saanna nakita a rimwar ti nasao a lalaki iti silidna kadagiti napalabas nga aldaw rason a nagpatulong daytoy kadagiti opisyales iti barangay a siripen ti silid.
Dita metten a nakitada ti senyales a nagbekkel daytoy.
Kabayatanna, imbinglay met ti kabsat ti agtagikua iti boarding house a sakbay ti insidente ket nakitana ti lalaki ken ti maatap a nobya daytoy nga agap-apa.
Iti imbestigasyon dagiti otoridad, kinunada ng awan iti senyales iti foul play gapu ta nasayaat ti kondisyon ti silid ti lalaki ken awan ti napukaw a sanikuana.
Malaksid iti dayta, adda ti narekoberda suicide note iti lamisaan iti kwarto ti lalaki.//Bombo Noveh Organo
