Manamnama a maipaay ti honoraria wenno benepisyo dagiti mannursuro a nagserbi iti 2025 National ken local elections iti siudad ti Baguio ita a lawas.
Iti panakiuman ti Bombo Radyo kenni Atty. John Paul Martin, election officer iti siudad ti Baguio, kinunana a dumanon iti 1,448 dagiti election workers a mannursuro a masweldoan.
Kinuna ni Atty. Martin a saan pay a naipaay ti honoraria dagiti mannursuro gapu ta nasken a maadal no siasino talaga dagiti nagserbi nangruna ket sumagmamano a mannursuro ti nagsakit ken nasukatan.
Malaksid iti dayta ket ado ti bilang dagiti nagserbi kas poll workers rason a saan dagus daytoy a makapasweldo kalpasan ti eleksyon.
Inlawlawag ti election officer a narigat no agdardaras daytoy a mangipaay iti sweldo dagiti mannursuro gapu ta nagkamali ket daytoy mang-abuno.
Impasigurado met ni Atty. Martin a “One time big time” ti panakaipaay ti sweldo dagiti poll workers.
Gapu iti dayta, manarimaan ti koordinasyonda iti Department of Education no adda iti nawaya a pagadalan a maaramat para iti panakaited ti honoraria dagitoy.
Saan met a naladaw ti panangipaay ni Atty. Martin kadagiti honoraria gapu ta naipaayan dagitoy iti sangapulo ket lima nga aldaw nga agpasweldo kas maitunos iti pammilin ti Commission on Elections.
