Manarimaan itan ti acclimatization dagiti atleta a paset iti delegasyon iti Rehion Cordillera iti 2025 Palarong Pambansa a maangay idiay Laoag City, Ilocos Norte mangrugi inton Sabado, May 24 agingga inton June 2.
Iti panakiuman iti Bombo Radyo kenni Mr. Gaudencio Gonzalez, ti Baguio City Sports Officer, kinunana a nasanayen dagiti atleta nga agadaptar kadagiti panniempo dagiti host cities ken host provinces a pakaang-angayan iti nasao a pasalip a kadawyan a napudpudot nu idilig iti panniempo wenno temperatura iti Baguio City.
Sigun kenni Gonzalez, kaadwan kadagiti atleta a mangbukbukel iti delegasyon iti Cordillera iti Palarong Pambansa ket nagtaud iti City of Pines.
Idi laeng kalman, balligin a nakadanon idiay Ilocos Norte dagiti daduma a miembro iti delegasyon iti Cordillera nu sadino, ti Cadaratan National High School idiay Bacarra, Ilocos Norte ti agserbi kas billeting area ti nasao a delegasyon.
Sigun iti opisyal, agarop duapulo a minutos ti mabusbus nga agbiahe manipod iti nasao a billeting area ken iti sentro iti host city.
Imbinglay ti opisyal nga iti agdama ket awan ti makitkitada a parikut seknan iti pagdagusan dagiti atleta ken coaches malaksid laeng kadagiti kadawyan ken saan a maliklikan a pakaseknan kas iti panagbiahe dagiti atleta paturong kadagiti playing venues.
Nupay kasta, imbinglay ti opisyal a naobserbaranda met ti panagsagana iti Department of Education para iti panakaipaay iti umdas a lugan a mangakomodar kadagiti atleta nga agbiahe.
Malaksid iti dayta, kinuna ti opisyal a nasayaat met ti kasasaad iti seguridad sadiay gapu ta adu dagiti kameng iti pulisya a makitkitada nga agbanbantay.//Bombo Rob Dominguez
