Impetteng ni Baguio City Vice Mayor-elect Faustino Olowan a saanna a panuynuyan dagiti indibidual nga agar-aramat iti naganna tapno makumbinsir dagiti vendors a mangipaay kadagiti lakoda.
Kasaruno daytoy ti panangaramat ti saan pay nabigbig a lalaki iti nagan ti bise mayor tapno maka-order iti produkto manipud iti local vendor idiay Igorot Park itay laeng nabiit.
Iti pannakiuman ti Bombo Radyo kenni Olowan, maikadua a daras a napasamak kenkuana ti nasao a modus nu sadino, immuna nga inaramatda ti nagan tapno maka-orderda iti restaurant.
Inlawlawag ni Olowan nga awan ti pakainaiganna kadagiti mangar-aramat iti naganna ken saan daytoy a mangipatpatungpal iti nasao a sistema iti panaggatang.
Kagiddan iti daytoy, immapela ti bise mayor kadagiti vendors ken kadagiti dadduma pay a negosyante nga agridam dagitoy kontra kadagiti manangallilaw ken saanda a dagus a mamati nangruna nu awan ti opisyal a surat manipud iti opisinana.
Kiniddaw pay ni Olowan kadagiti negosyante a dagus nga iyawag iti 911 nu adda ti maranaanda a kapada nga insidente tapno dagus a makemmeg dagiti responsable iti daytoy ken saanen a maulit ti aramidda.//Bombo Rob Dominguez
