Inkeddeng iti Land Transportation Office(LTO) a guilty ti nagviral a motovlogger ken lady rider a ni Yanna.
Daytoy ket kalpasan ti insayangkatda nga imbestigasyon seknan iti kontrobersyal a video a naipablaak nu sadino, naimatangan ti suppiat iti nagbaetan ni Yanna ken ti maysa a driver iti pickup truck idiay Zambales.
Iti naipablaak nga impormasyon manipod iti opsiyal a facebook account iti Land Transportation Office, nakalanad a napagmulta ni Yanna iti P5,000 gapu iti kinaawan iti side mirror iti inaramatna a motorsiklo ken P2,000 met para iti reckless driving.
Malaksid iti dayta, agtaltalinaed met nga epektibo ti panakasuspindir ti driver’s license daytoy agingga a saanna pay insuko ti inaramatna a motorsiklo iti Land Transportation Office gapu ta maatap nga immunan a kinuna ti nasao a lady rider a saanna nga isuko ti nasao a motorsiklo.
Iti pito a panid iti desisyon, inlanad ti nasao nga opisina a narisgo ti inaramid ti motovlogger a panagmaneho idi inunaanna ti pickup truck nangruna ta awanan pay daytoy iti side mirror.
Naibasar ti nasao a pangngeddeng iti nagviral a video nga impablaak mismo ni Yanna, ti apology letter daytoy, ken ti affidavit nga insumitir iti pickup driver.
Sumangsango ita ti motovlogger iti kaso a Reckless Driving, ken panangmaneho iti motorsiklo nga awanan iti side mirror.
