Imbilin ti Land Transportation Office (LTO) iti nasurok a dua gasut a driving school iti intero a pagilian nga ilawlawagda ti mapapati a pannakabalbaliw dagiti computer system-da tapno ad-adu ti maakomodarda nga estudyante.
Sigun iti Land Transportation Office, nangipaulogdan ti show cause orders kadagiti driving schools gapu iti sumagmamano a panaglabsing a pakairamanan ti panangi-upload iti ad-adu a theoretical ken practical driving course certificates, ken ti panangipaayda iti sertipiko uray no saan a nakompleto dagiti aplikante ti kasapulan a bilang ti oras.
Malaksid iti dayta, imbilin pay ti nasao nga ahensia kadagiti walo pulo ket walo a district heads a mangsaklaw iti nasurok a 200 nga driving schools a mangilawlawag no apay a pinalubosanda dagiti driving schools a mangisayangkat kadagiti kapada nga aktibidad, ken no apay a saan pay a narisut dagitoy.
Sinuspindir metten ti LTO idi napalabas a bulan ti nasurok a 100 a driving schools gapu iti no-show wenno saan a panagtungpal iti umno a theoretical driver’s training.
