BAGUIO CITY – Naituding nga iyemplementar ti Police Regional Office Cordillera (PRO-CAR) ti “three-minute response time” wenno ti dagus a panagresponde kadagiti emergency calls iti siudad ti Baguio.
Sigun kenni Police Brigadier Rogelio Raymundo Jr., Police Regional Office- Cordillera Deputy Regional Director for Administration a manarimaan ti panagplanoda iti panakaipatungpal ti three-minute response time babaen iti internet-based Zello application ken ti conventional radio.
Innayon ni Raymundo Jr. a napasamak metten ti rehearsal dagitoy maipapan iti implementasyon ti walo nga oras a panagduty dagitoy.
Kabayatanna, immunan a nagkomit ni Philippine National Police chief Police General Nicolas Torre III nga ipatungpal dagitoy ti “three-minute response goal” iti las-od iti tallo a bulan.
Paset ti nasao nga inisyatiba a pasayaaten pay ti strategy ti Philippine National Police ken ti panangipasigurado iti presensya dagiti pulis kadagiti kritikal a sitwasyon.
Malaksid iti dayta ket para iti panakapasayaat ti peace and order ken ti panangkita a safe dagiti kalsada kadagiti amin a Pilipino kas direktiba ni President Ferdinand Marcos Jr.
