Agarup walo nga empleyado wenno kameng ti law enforcement unit ti naikkat iti pwesto iti syudad ti Baguio pakairamanan ti chief of officers ken flying squad gapu iti panagkotong dagitoy ken ti panakasuksukda.
Daytoy ket kagiddan metlaeng ti panag-adu dagiti disgrasya a mapaspasamak iti syudad.
Iti panakiuman ti Bombo Radyo kenni Retired PBgen Glen Dumlao, Regional Director ti Department of Transportation Cordillera, impeksana nga ado dagiti mangongotong a law enforcers iti syudad ti Baguio rason a nasken a mareshuffle dagitoy wenno agikkatda.
Inlawlawag ti Regional Director a no maipapan kadagiti vehicular traffic accidents ket dua laeng ti rason a makitkitada, ti road worthiness ken drivers error wenno ti competency ti maysa a driver.
Impakaamo pay ni Dumlao a kadagiti mapaspasamak nga aksidente ket mangisayangkat dagitoy iti bukod-da nga imbestigasyon malaksid iti ipatpatungpal dagiti pulis.
Kinuna ni Dumlao a dagiti karaman kadagiti aksidente ket maipaayan iti show cause order tapno maamoan no anya a licensing office ti nangipaay iti lisensya dagitoy wenno no kasano a nakaalada iti lisensya
Malaksid iti dayta ket tapno maduktulan no anya a distrito a nakarehistro ti lugan dagitoy.//Bombo Noveh Organo
